دوسرے ون ڈے میچ میں سری لنکا نے پاکستان کے سامنے 289 رنز کا ہدف رکھ دیا ہے۔
راولپنڈی کرکٹ اسٹیڈیم میں جاری دوسرے ون ڈے میچ میں مہمان ٹیم سری لنکا نے 50 اوورز میں 8 وکٹوں کے نقصان پر 288 رنز بنائے۔ سری لنکا کی جانب سے لنتھ لیاناگے نے 54 رنز کی نصف سنچری اننگز کھیل کر سب سے نمایاں کارکردگی دکھائی۔
دیگر بلے بازوں میں کمنڈو مینڈس نے 44، سدیرا سمارا وکرما نے 42، کامل مشرا نے 27، پتھم نسانکا نے 24، کوشل مینڈس نے 20، چیریتھ اسالنکا نے 6، جبکہ دشمانتا چمیرا صفر پر آؤٹ ہوئے۔
پچھلے میچ کے نصف سنچری میکر ونندو ہسارنگا نے 37 اور پرامود مدوشن نے 11 رنز کی ناقابل شکست اننگز کھیل کر ٹیم کو معقول سکور تک پہنچایا۔
فیلڈنگ
پاکستان کی جانب سے ابرار احمد اور حارث رؤف نے 3، 3 وکٹیں حاصل کیں، جبکہ محمد وسیم جونیئر نے ایک وکٹ لی۔ میچ سے قبل پاکستان نے ٹاس جیت کر پہلے فیلڈنگ کا فیصلہ کیا اور ٹیم میں دو تبدیلیاں کیں. شاہین شاہ آفریدی اور فہیم اشرف کی جگہ ابرار احمد اور وسیم جونیئر کو شامل کیا گیا۔
پاکستانی ٹیم کی قیادت سلمان علی آغا کر رہے ہیں. جنہوں نے بتایا کہ شاہین آفریدی کی طبیعت ناساز ہونے کی وجہ سے وہ میچ نہیں کھیل رہے۔
سیکیورٹی کے حوالے سے سخت انتظامات کیے گئے ہیں. پولیس حکام کے مطابق اسٹیڈیم کے اطراف سخت حفاظتی اقدامات کیے گئے ہیں. ٹیموں کی آمدورفت کے دوران اضافی نفری تعینات رہے گی. حالیہ دہشت گردی کے واقعات کے پیش نظر جامع تلاشی کو مزید سخت کیا گیا ہے.
اسٹیڈیم کے قریبی عمارتوں پر ماہر نشانہ باز تعینات ہوں گے. اور وی آئی پی پارکنگ میں صرف اسٹیکر والی گاڑیوں کو داخلے کی اجازت ہوگی۔
پاکستان کرکٹ بورڈ کے چیئرمین محسن نقوی سے سری لنکن کھلاڑیوں نے ملاقات بھی کی. شائقین کرکٹ کو ہدایت کی گئی ہے کہ وہ اپنی شناختی دستاویزات ساتھ رکھیں. پولیس حکام نے تمام افسران کو میچ کے دوران مشکوک سرگرمیوں اور افراد پر کڑی نگاہ رکھنے کی ہدایت کی ہے۔
