پاکستان کی قومی ایئرلائن پی آئی اے کے 75 فیصد حصص عارف حبیب گروپ نے 135 ارب روپے کی بولی جیت کر حاصل کر لیے۔
پی آئی اے کی نجکاری مکمل: عارف حبیب کنسورشیم نے 135 ارب روپے میں 75 فیصد شیئرز خرید لیے
اسلام آباد – پاکستان کی قومی ایئرلائن پاکستان انٹرنیشنل ایئر لائنز (پی آئی اے) کی نجکاری کا عمل مکمل ہو گیا۔ عارف حبیب کنسورشیم نے ادارے کے 75 فیصد شیئرز 135 ارب روپے. کی بولی جیت کر حاصل کر لیے۔ اب قومی ایئرلائن کے جہاز عارف حبیب گروپ کے زیرِ انتظام اڑائے جائیں گے۔
نجکاری کمیشن کی جانب سے منعقد کی گئی. نیلامی کی تقریب میں شدید مقابلہ دیکھنے میں آیا۔ صرف دو کنسورشیمز – عارف حبیب اور لکی کنسورشیم – نے بولی میں حصہ لیا اور تین راؤنڈز کی نیلامی ہوئی۔
پہلے راؤنڈ میں عارف حبیب کنسورشیم نے 115 ارب روپے جبکہ لکی کنسورشیم نے 101 ارب 50 کروڑ روپے. کی بولی لگائی۔ دوسرے راؤنڈ میں بولی 121 ارب روپے تک پہنچ گئی، جس کے بعد وفاقی وزیرِ خزانہ سینیٹر محمد اورنگزیب نے تقریب سے خطاب کیا۔
بولیاں
تیسرے اور فیصلہ کن راؤنڈ میں دونوں کنسورشیمز نے بڑی بڑی بولیاں لگائیں۔ جب رقم 135 ارب روپے پر پہنچی تو لکی کنسورشیم نے دستبردار. ہو کر عارف حبیب کنسورشیم کو مبارکباد پیش کی۔
تقریب کے مہمانِ خصوصی مشیرِ نجکاری محمد علی نے کہا کہ پی آئی اے کی نجکاری سے ملک میں نئی سرمایہ کاری آئے گی اور قومی ایئرلائن ماضی کی طرح ترقی کی راہ پر گامزن ہو گی۔ انہوں نے بتایا کہ حکومت نے ابتداً 51 سے 100 فیصد شیئرز کی نجکاری کا فیصلہ کیا تھا، تاہم بڈرز کی خواہش پر 75 فیصد شیئرز کی بولی ہوئی۔ باقی 25 فیصد شیئرز کے معاملات 90 دنوں کے اندر طے کیے جا سکتے ہیں۔
پیمنٹ کے حوالے سے مشیر نجکاری نے وضاحت کی کہ دو تہائی رقم ابتدائی طور پر اور ایک تہائی بعد میں ادا کی جائے گی۔ بولی جیتنے والے کنسورشیم کو دو مزید پارٹیز کو اپنے ساتھ شامل کرنے کی بھی اجازت دی گئی ہے۔
ان کا مزید کہنا تھا کہ نیلامی. سے حاصل ہونے والی رقم کا 92.5 فیصد حصہ براہِ راست پی آئی اے کی بہتری اور ترقی پر خرچ کیا جائے گا۔
یاد رہے کہ پی آئی اے طویل عرصے سے مالی مشکلات کا شکار رہی ہے اور نجکاری کو اس کے احیا کے لیے ایک اہم قدم قرار دیا جا رہا ہے۔
