آلپس میں 20 سال بعد ونٹر اولمپکس کی واپسی؛ آئس ہاکی، اسکیٹنگ، سکیئنگ اور سنو بورڈنگ ایونٹس مرکز میں
میلان/کورٹینا — اٹلی کی سرزمین 25ویں ونٹر اولمپکس کی میزبانی کر رہی ہے، جو میلان-کورٹینا 2026 کے نام سے تاریخ رقم کریں گے. یہ اولمپکس آلپس میں 20 سال بعد منعقد ہو رہے ہیں. اور 19 روزہ تقریب میں دنیا بھر سے تقریباً 3,500 ایتھلیٹس حصہ لیں گے۔ یہ کھلاڑی 116 ایونٹس میں 16 مختلف ڈسپلنز میں مقابلہ کریں گے۔
ونٹر اولمپکس کب شروع ہوں گے؟ سرکاری طور پر گیمز کا آغاز جمعہ سے ہوگا. تاہم پہلے کوالیفائنگ راؤنڈز بدھ سے شروع ہو جائیں گے. اور پہلے تمغے ہفتہ کو تقسیم کیے جائیں گے. اختتامی تقریب 22 فروری کو ویرونا اولمپک ایرینا میں منعقد ہوگی۔
افتتاحی تقریب
افتتاحی تقریب کب اور کہاں ہوگی؟ اولمپکس کی باقاعدہ افتتاحی تقریب بھی جمعہ کو ہوگی۔ تاریخ میں پہلی بار یہ تقریب ایک سے زائد مقامات پر منعقد کی جا رہی ہے۔ مرکزی تقریب میلان کے مشہور سین سیرو اسٹیڈیم میں ہوگی، جس کی گنجائش 80 ہزار افراد کی ہے اور یہ اسٹیڈیم شہر کے دو مشہور فٹ بال کلبز اے سی میلان اور انٹر میلان کا گھر ہے۔
اس کے علاوہ پریڈازو، لیوینو اور کورٹینا ڈی ایمپیزو میں بھی تقریبات ہوں گی، جہاں مختلف مقابلوں والے علاقوں میں وفود کی پریڈ ہوگی۔ افتتاحی تقریب میں اطالوی اور بین الاقوامی مشہور فنکار شامل ہوں گے جن میں امریکی پاپ اسٹار میریاہ کیری بھی شامل ہیں۔ تقریب میں تقریباً 60 ہزار تماشائی شرکت کریں گے جبکہ اس کی تیاری میں 27 سے زائد ممالک کے 1,300 سے زیادہ پروفیشنلز اور رضاکار شریک ہیں۔
میلان-کورٹینا گیمز کہاں کہاں منعقد ہوں گے؟ یہ برفانی کھیل دو اہم مراکز کے گرد منعقد ہوں گے:
- میلان — اٹلی کا دوسرا سب سے بڑا اور آبادی والا شہر
- کورٹینا — ڈولومائٹس پہاڑوں میں واقع ایک پرتعیش اور مشہور ونٹر ریزورٹ
یہ دونوں شہر آلپس کے شاندار نظاروں کے پس منظر میں کھیلوں کی میزبانی کریں گے، جو ونٹر اولمپکس کی روایت کے مطابق قدرتی خوبصورتی اور جدید سہولیات کا بہترین امتزاج پیش کریں گے۔
ونٹر اولمپکس 2026 نہ صرف کھیلوں کا تہوار ہے بلکہ اٹلی کی ثقافت، فن اور قدرتی حسن کو دنیا کے سامنے پیش کرنے کا ایک عظیم موقع بھی ہے۔
